Matthew 18

Toireꞌ Teing Pankenuka Tee-koo Muuꞌ Paninung-koo

(Mak 9:33-37, 42-48; Luk 9:46-48; 17:1-2; 15:3-7)

1Tenang eeꞌnang napoꞌ teinge bakaning barevare-nupoonge porora Jiisuuꞌ niaꞌaama aaꞌpauꞌ, “Pankaing baa tee-koo muuꞌ paninung-koo?” 2Teketa Jiisuuꞌke narung tootoꞌ bokuvura teing-koo meuꞌ donkong-antavura aaꞌpuruꞌ, 3“Masikaꞌ naurampimang, diiꞌ diikaang domang bereꞌdariarura deekoꞌ toirekaaꞌpinaꞌ onou-koo diiꞌ teing bakei makosiriaꞌ teꞌ muuꞌ paninung-koo tung-koo. 4Teeꞌkoo baa tee naning baka boonko noruꞌaravaing aung-pinaꞌ tootoꞌpinaꞌ tee tee eeꞌnung muuꞌ paninung-koo pankaing. 5Eeꞌnoko baa tee naning ning nkaang miring-koo onkeonkeꞌuaing narung tootoꞌ okiꞌnara aung-pinaꞌ oroꞌ teie tee onkeonkeꞌmuaing.

6“Teka Baa tee naning aing toireꞌ ning masikaꞌantamaamaing-koo narung duaꞌantavuaing tee-koo orara aarumo-koo deekoꞌ tee tee piaaruꞌ. Teeꞌ oroꞌ naning baukoi paravuaruuꞌnung dei tampaꞌ, aiꞌ Kumponinge aaꞌnaꞌ kiimatavuaing tee. 7Bakei piaaruꞌnuka kansiꞌnupoong amutemuriaunanka orara aarumo-koo nantoong duaꞌantavaarimaing. Masikaꞌ, teeꞌ oroꞌ aarumo duaꞌanta-koong tee poaing, teka bakei piaaruꞌnuka teing nantoong teeꞌ oroꞌ aarumo tavoꞌantavaavaining!

8“Eeꞌnoko dakaang birenge niiꞌnooꞌ kauꞌke duaꞌantaruko deekoꞌ orara aarumo-koo, napuꞌdarara taapoꞌ duaꞌeaing tenauꞌ. Tampaꞌ masikaꞌ tee daꞌ nanauꞌ kopuꞌdarara deꞌdoonima domaang otoi otoꞌnooꞌ beaing, ookanauꞌka otoi ntaꞌkoo otoi-otoꞌkoong-koo duaꞌduꞌneenga. 9Eeꞌnoko napoꞌ dakaang dutai orari-antaruko deekoꞌ kaꞌbantarara taapoꞌ duaꞌeai. Tampaꞌ masikaꞌ tee daꞌ naruta otoi domaang otoi otoꞌnooꞌ beaing, ookaruta otoko mosianung-koong ntaꞌkoo duaꞌdaaꞌneenga. 10Teeꞌkoo tarerariri otoriaing diiꞌke aing-koo narung okiꞌnarekaꞌkoo tamung baaꞌpinaꞌ ooeriꞌneeng, aiꞌ toireꞌ biikaning koosinunakai tee paning-koo uatepa Mmaꞌanko beroma siraꞌpaarimaung baata teing anutua orakaꞌ nkoaarimaing.

11“Eeꞌnoko ning Tee Naning-naumpoꞌ Paning-etaing tee nantoong toireꞌ makosinuka pooariruꞌning besiꞌkoo mouꞌnung. 12Arekeeꞌ noruꞌerimang diiꞌke, naning narung daakuꞌ sipisipiꞌ otoꞌevuma otopeuꞌnung eeꞌnoko teing-koo nau pooari dei, teie ee teing niiꞌning mmauꞌ tee-koo mii-koo niiꞌnameng-koo sipurira teu nau besiꞌkoo nanuarupeuꞌ pooarapeuꞌnu? 13Eeꞌnoko masikaꞌ minkuamaang, teie daaꞌura deekoꞌ teu, tee tee bakei aaꞌnaꞌ dotuarapeuꞌ teu-koo eeꞌnu-koo sipisipiꞌnu-koo, bane teing niiꞌning mmauꞌ otoroko pooariarupeuꞌning. 14Teeꞌ nariꞌ napoꞌ tee eeꞌnung Diuma paning-koong koontoꞌ piavoaꞌ narung toireꞌkoo okiꞌnarekaꞌ makosinuka-koong paaꞌkoo.”

Naning Daꞌmaikoꞌ Orakaꞌ Nkoarapeuꞌnung Koong-antanaꞌ

15“Naning daꞌmarang-koonge orakaꞌ nkoruko deekoꞌ bera naueai bakaang orakaꞌnko deeꞌ deeꞌka otoresi, eeꞌnoko daꞌ taararuaing deekoꞌ tee dake tampameng-koo barampeing tee. 16Teka daꞌ taararuaruko deekoꞌ niiꞌnara niiꞌnooꞌ kenaankara daꞌ ninka bokuereta nariꞌ beriai tee-anko. Teeꞌ nkoveko ookara kapooꞌnanka makosinaꞌ masikaꞌ siraꞌparavaing kenaankarai niiꞌnooꞌ beenaumoi ooaioꞌ.

(Boto 19:15)

17Eeꞌnoko napoꞌ teing taara-koo piavoaruko deekoꞌ dootuuꞌkoo siraꞌpeai. Eeꞌnoko napoꞌ dootuuꞌnupoong taara-koo piavoaruko deekoꞌ koontoꞌ mutaanang-koong-pinaꞌ niiꞌnooꞌ taakisi nkanuka-koong-pinaꞌ nariꞌ nkoveriaing. 18Masikaꞌ naurampimang, aming kapooꞌ diiꞌke anke kansiꞌkoo pinkaꞌeriaing tee napoꞌ paning-koo pinkaꞌari otoainge, eeꞌnoko aming kapooꞌ anke kansiꞌkoo diiꞌke dapaꞌeriaing deekoꞌ, paning-koo teeꞌ nariꞌ dapaꞌari otoainge. 19Napoꞌ eeꞌ naurampiiꞌnaang, diiꞌkoo niiꞌnaankai anke kansiꞌkoo kapooꞌkoo kara naroompereta niaꞌkireko deekoꞌ tee teeꞌ nariꞌ piaroreainaꞌ nko-antavuaing teie Mmaꞌke paning-koonge. 20Aiꞌ areꞌ tokoo beenaumo niiꞌnooꞌ kenaanka naroꞌ poroainooꞌ nkaang miring-koo, ning tee teke teing-ankoi nariꞌ oꞌnoaing.”

Tee Mirumiruꞌ Naning Tontaꞌanta Noruꞌuaung-koong

21Teketa Piitai pora Jiisuuꞌ niaꞌuma aaꞌpuuꞌ, “Ovoring, ninge naning mmarang-koong arekeeꞌning bateie tontaꞌantavampeuꞌ ning orakaꞌ nkomuko deekoꞌ? Aiꞌ ~kemuꞌka-taae?” 22Teka Jiisuuꞌke makuꞌuma aaꞌpuuꞌ, “Ninge eeꞌ nauramaꞌnaang, ~kemuꞌka-taae deeaꞌ, teka teing ~kemuꞌka-taa tampematomaing amutemuꞌari ~kemuꞌka-taa kivora-namuꞌpie tontaꞌantaveaing tee daꞌmaikoꞌ.

23“Teeꞌkoo tee muuꞌ paninung tee eeꞌ oroꞌpari otong: Narung daurarong~ otopeuꞌnung, eeꞌnoko teie bakaning botovotonaaꞌnuka biikaang komaaru~ tee-koo nkoauꞌning nerivuuꞌnaang piavouꞌ. 24Teketa nerivuri otoko naning mmauꞌ koko-kokoreiꞌ mooniꞌ nkavuuꞌnung tee-anko poꞌantavauꞌ bakaang komaaru narivuuꞌnaang. 25Teketa pora teie mooꞌ kasi-antavuaruioꞌ teie bakaang ovoringe eeꞌ minkuvuuꞌ, ‘Ookara-daꞌ, daꞌaang, eeꞌnoko daurukaaꞌ, eeꞌnoko dakaning kapooꞌnanka baave-koong tee komaaru makuꞌaravainaꞌ.’ 26Teketa teie botovotonaaꞌ tee-koo uroꞌkanooꞌ miinge keemparara eentavarama aaꞌpuuꞌ, ‘Ioꞌ siꞌmera batei ameko ookara kapooꞌnanka makuꞌderompaing.’ 27Eeꞌnoko teie bakaang ovoringe teeꞌ oovura bakaang domang aaꞌnaꞌ piaavouꞌ tee-koo, eeꞌnoko unaa-antavuma tontaꞌevuuꞌ tee bakaang komaaru.

28Teka tee eeꞌnung botovotonaaꞌ teketa tenkenura teie niiꞌnung botovotonaaꞌ oovuuꞌ napoꞌ tee-koo nau kiinaꞌnu komaaru otoꞌevuing. Eeꞌnoko teie mooꞌura keniꞌuma aaꞌpuuꞌ, ‘Koontoꞌ makuꞌmemuai tee nkaang mooniꞌ dake nkaveuꞌnung!’ 29Teketa tee eeꞌnung baꞌmaikoꞌ doonko kinkinura eentavarama aaꞌpuuꞌ, ‘Ioꞌ siꞌmera batei ameko makuꞌderompaing.’ 30Teka teie arooꞌuaꞌ teeꞌ minkuarako, nka teie bera kiimatanava-koo daiꞌantavuuꞌ teke otooꞌnaang bera tee komaaru makuꞌuainooꞌke basi.

31Eeꞌnoko niiꞌning botovotonaaꞌnukai tee teie teeꞌ nkovuko ooaara orakaꞌ deeꞌorora berora tee biikaang ovoring nauauꞌ ookara kapooꞌ teie nkovuuꞌnung. 32Teketa teie bakaang ovoringe tee botovotonaaꞌ kuung bokuvuuꞌ. Bokuvura aaꞌpuuꞌ, ‘Daꞌ tee bakei orara botovotonaaꞌ! 33Ninge teing dakaning komaarunanka eentameioꞌ ookara oꞌantareronsioꞌ dake aming-koo tee daꞌmaikoꞌ nariꞌ botovotonaaꞌ piaavearui teeꞌ ninge piaarantuꞌnaꞌ daꞌ?’ 34Eeꞌnoko teie bakaang ovoringe iiravoma tee kiimata-nupoong tanatanuka-anko kosiꞌuuꞌ teke kiimatavari otooꞌnaang bera ookara komaarunanka makuꞌuainooꞌke basi.

35Teeꞌ eeꞌnaꞌ nariꞌ teie Mmaꞌke paning-koonge diiꞌ narunaꞌ narunaꞌ nkoruriaing diiꞌmarang tontaꞌantaverereriaruko deekoꞌ diikaang domang-eta.”